SIMPULUM

SIMPULUM

vas fuit parvum, non dissimile cyatho, quô vinum in sacrificiis litabatur, a sumendo dictum Varroni de L. L. l. 4. quod co vinum sumebant minutatim: Scaligero a sympone, quod, ortum ex Graeco σίφων, vasculum significet cum tenui fistula vel angusto collo ad pitissandum vinum. Eius iconem exhibet Ioh. Rosin. Antiqq. Rom. l. 3. c. 32. Ex argilla fuit, ante auri argentique inventum usum, quemadmodum et templorum parietes, ipsa Deorum simulacra antiquitus fictilia fuêre: quod in antiquitatis memoriam servatum fuisse, innuit Plin. l. 35. c. 12 In sacris quidem etiam, inter has opes hodie, non murrhinis crystallinisve, sed fictilibus, prolibatur sympuviis. Quô nomine Simpula indigitari Bayrius aliique docent, adeoque sympullis legunt. Dempsterus vero nihil censet mutandum: Namque apud vet. Schol. Iuvenalis ad Sat. 6. v. 342. Simpuvium, vas est sacrificus aptum, in quo Pontifices solebant lavare: sic dictum, quia omnes Sacerdotes simul bibebant. Satyrici autem verba haec sunt,

Et quis tunc hominum contemptor Numinis, aut quis

Simpuvium ridere Numae, nigrumque catinum,

Et Vaticano fragiles de more patellas

Ausus erat?

Hinc Simpulatrices, feminae sacris deditae et Simpuviatrix, quae poculum sacrum porrigebat, apud praefatum Scholiasten. Glossar. Isidori Candes, vasa sictilia, istiusmodi pocula reddit. Vide iterum Rosinum Antiqq. l. 5. c. 30. in Notis. Sed et Simpulator inde, conviva adsiduus Isidoro, quem Simpulonem Fulgentius Placiades vocat. Unde forte colligas, Sympinium Arnobii l. 7. Pateras sympiniaque depromite, a Graeco συμπίνειν, non multum a Simpulo abludere: hoc ipsum enim in sacrificiis olim fieri solitum, et reliquias ac pocula delibata populo tradita, ex Minucii Octavio discimus. Vide quoque Hadr. Iunium Notis ad Nonium, voce Samium, et eius Animadversa l. 2. c. 10. Adde Stewechium ad Arnobium l. 4. ubi vasis Ecclesiasticis suae gentis hodieque vasculum ex quo aqua aut vinum Sacerdoti ad altare praebeatur, Publla appellari notat. Bocharto Simpulum, dictum est ab Hebr. sephel, quod in Scriptura bis solum occurrit in Historia Gedeonis Iudicis Iudic. c. 6. v. 38. et in Cantico Deborae, Iudic. c. 5. v. 25. e quo utroque tamen loco cum sephel videatur fuisse vas patens et amplum, non videntur haec duo plane synonyma, quamvis utriusque non nisi in sacris usus fuerit. Eidem Simpuvium, vasis lignei genus fuit, itidem in Sacris adhibitum: cuius vocis originem deducit ab Hebr. saph, quâ voce vas, quô Agni Paschalis sanguis excipiebatur, venit, Exodi c. 12. v. 22. cuius plur. sippim et sappoth, vel sippoth, Ierem. c. 52. v. 19. et 1. Regum. c. 7. v. 50. ubi de vasis Sanctuarii. Vide eum Hieroz. Parte prior. l. 2. c. 49. et 50.